Müəllimləri intihara cəhd edən məktəblidən danışdı

Müəllimlərin təzyiqinə görə intihara cəhd etdiyi deyilən 109 nömrəli tam orta məktəbin 5-ci sinif şagirdi F. Ə.-nin müəllimləri danışıb.

Onlar bildiriblər ki, haqlarında səsləndirilən ittihamlar tam yanlışdır. Şagirdin Azərbaycan dili və ədəbiyyat müəllimi və sinif rəhbəri olan Bahar Haqverdiyevanın sözlərinə görə, şagirdinin bu hərəkəti onun üçün gözlənilməz olub: “Onun belə bir addım atmasına hələ də inana bilmirəm. Valideyni də vaxtaşırı məktəbdə olurdu. Bu dərs ilində fənlər üzrə qiymətlərində kəskin fərqlər olmamışdı. Özünün çalışqanlığı və intizamı yerində olsa da, kiçik diqqətsizlik və laqeydlik səbəbindən bəzi fənlərdən zəif nəticələri də olurdu. Bunlarla bağlı tövsiyələrimi özünə və valideyninə də bildirmişdim. Həmin gün də dərsdən çox sakit halda evlərinə getdiyini söyləyir müəllimlər. Evə gedəndən sonra belə bir addım atması mənim üçün çox gözlənilməz oldu və onun bu hərəkəti məni dərindən kədərləndirdi. Uşaqlarla da normal ünsiyyət qurmağa meyillidir”.

Məktəbin informatika müəllimi Nigar Məmmədova bildirib ki, hadisədən sonra xəstəxanaya gedib şagirdinin vəziyyəti ilə maraqlanıb: “O, çox düşüncəli, müəllimlərlə səmimi bir qızdır. Həmçinin müəllimlərin də ona münasibəti çox yaxşıdır. Məktəb rəhbərliyi, sinif rəhbəri və məktəbin digər əməkdaşları ilə birgə evlərinə də getdik, onunla xeyli söhbət etdik, mənəvi-psixoloji dəstək göstərdik. Bu görüşdə şagirdimiz də bizdən ötrü çox darıxdığını və etdiyi hərəkətdən çox peşman olduğunu bildirdi”.

Qeyd edək ki, F.Ə. mayın 1-də atasının istifadə etdiyi əsəb əleyhinə olan dərman həblərini qəbul edərək intihara cəhd edib.