“Bəzi hallarda gözləntilər hələ özünü doğrultmayıb” - Mikayıl Cabbarov

“Biz vergi islahatlarının birinci ilindəyik. 2018- ci ili keçid ili kimi elan etdik”

Bunu İqtisadiyyat naziri Mikayıl Cabbarov “REAL” TV-yə verdiyi müsahibəsində deyib.  O qeyd edib ki, yalnız inzibatçılıqda fərqli yanaşmaları 2018-ci ildə tətbiq edilib: “Qanunvericilik paketi 2017- ci ilin dekabrından öncə qəbul edilib. Vergi islahatlarının qanunvericilik paketi 2019- cu ilin yanvarın 1-dən tətbiq olunur. Ona baxmayaraq ötən 10 ay artıq gözlədiyimiz müsbət nəticələri verib. Bəzi hallarda gözləntilərimizdən daha yaxşı nəticələr əldə etmişik. Bəzi hallarda gözləntilər hələ özünü doğrultmayıb. Bu sahələrdə müvafiq inzibatçılıq davam etdirilir və nəticələr əldə olunacaq. Amma məncə sual altına qoyulmayan odur ki, qısa müddət keçməsinə baxmayaraq biz vergi inzibatçısı ilə vergi ödəyicisi arasında münasibətin təbiətinin dəyişdirilməsinə nail ola bilmişik.

Mən deyə bilmərəm ki, bu proses başa çatıbdır. Bu daimi bir prosesdir. Hər iki tərəf daimi olaraq təkmilləşə bilər.  Dostluq birtərəfli ola bilmir, dostluq hər zaman ikitərəfli bir yoldur. Çünki sən dost dedikdə güvənirsən, eyni zamanda, hər zaman özün güvənmək üçün insana hüquq verirsən. Deyəndə ki, hazırdırmı, yoxsa yox?  Mən birmənalı şəkildə inanıram ki, Azərbaycanda iqtisadi fəaliyyətin subyektləri artıq böyük bir yol keçiblər. İnanıram ki, hər iki tərəf buna hazırdır. Biz öz tərəfimizdən bu yolu keçməyə hazırıq”.